धरानः अन्तर्राष्ट्रिय आमन्त्रण बुढासुब्बा गोल्डकप फुटबल प्रतियोगिताको आयोजकले आय–व्यय सार्वजनिक गरेको छ ।
आयोजक धरान फुटबल क्लबले अध्यक्ष प्रताप तामाङले अघिल्लो वर्षदेखि बुढासुब्बा गोल्डकप नाफामा गएको जानकारी दिए । ‘२४ औं संस्करणमा १७ लाख २८ हजार ९ सय ८५ रुपैयाँ नाफा भएको थियो’, उनले भने, ‘२५ औं संस्करण अर्थात् यस वर्ष ६ लाख रुपैयाँ नाफा भएको छ ।’
उनका अनुसार गेट टिकटबाट ९ लाख ६५ हजार रुपैयाँ संकलन भएको बताए । खेल हेर्न आउनेलाई पास वितरण नगरिँदा दर्शकबाट राम्रो साथ पाएको उनले बताए ।
आइतबार पत्रकार सम्मेलन गर्दै गएको माघ १९ देखि २६ गतेसम्म आयोजना भएको प्रतियोगिताको आयव्यय सार्वजनिक गर्दै प्रतियोगितामा ६ लाख ५९ हजार ५० रुपैयाँ नाफा भएको कोषाध्यक्ष धनबहादुर राईले जानकारी दिए । यस वर्ष ६६ लाख ९९ हजार १५० रुपैयाँ आय भएको थियोे भने ६० लाख ४० हजार १०० रुपैयाँ खर्च भएको आयोजकले जनाएको छ ।
धरानको पूर्वी स्टार होटलमा आयोजित पत्रकार सम्मेलनमा धरान उपमहानगरपालिकाबाट ९ लाख, कोशी प्रदेश खेलकुद विकास बोर्डबाट ५ लाख, अरुण राई (पोर्चुगल) बाट ५ लाख, गोर्खा ब्रुअरी प्रालिबाट ४ लाख २५ हजार, धरान युके हेल्पिङ हेन्डस युकेबाट ४ लाख ५० हजार, धरान हङकङ मञ्च (हङकङ) ३ लाख ३७ हजार ८ सय, सुनसरी टेक्निकल कलेजबाट १ लाख, धरान समाज युकेबाट १ लाख ७९ हजार ३ सय ५०, रेडबुल, काठमाडौं १ लाख १० हजार, सुनसरी उद्योग वाणिज्य संघ ६० हजार, माउन्ट एभरेष्ट ट्रेनिङ सेन्टर धरानबाट ७० हजार प्राप्त भएको क्लबले जनाएको छ ।
यस्तै, यातायात व्यवसायी संघ धरानबाट ४० हजार, धरान उपमहानगरपालिका (उपमेयर कोष) १ लाख, धरान दुबई हेल्पिङ हेन्डस ५० हजार, जापान (धरानबासीलगायत अन्य सहयोगी) ७५ हजार, पुरन राई (बहराइन) ५० हजार, केन्द्र लिम्बू (पोर्चुगल) ५० हजार, धरान बहराइन एकता समाज बहराइन १ लाख २० हजार, मोहन गुरुङ हङकङ ५० हजार, निजी विद्यालयहरु १२ हजार, हङकङमा रहेका धराने पूर्व खेलाडीहरुबाट १ लाख ७० हजार, स्व. रत्नबहादुर प्रियारानी स्मृति प्रतिष्ठान धरान ५० हजार, धरान भेट्रान फुटबल क्लब ७० हजार, सिजनल टिकट बिक्री २ लाख, विभिन्न सरकारी, गैर सरकारी, वित्तीय संघसंस्था र उच्च व्यक्तित्वहरुबाट ८ लाख ९५ हजार, क्यान्टिन बिक्री ४० हजार, गेट टिकट बिक्रीबाट ९ लाख ६५ हजार संकलन भएको कोषाध्यक्ष राईले जानकारी दिए ।
कोषाध्यक्ष राईका अनुसार अझै १५ लाख रुपैयाँ उठ्न बाँकी रहेको छ । अखिल नेपाल फुटबल संघ (एन्फा) बाट ५ लाख, राष्ट्रिय खेलकुद परिषदबाट ३ ला, धरान उपमहानगरपालिकाका सबै वडाबाट ७ लाख रुपैयाँ उठ्न बाँकी रहेको क्लबले जनाएको छ ।
क्लबका अध्यक्ष तामाङले टोली ब्यवस्थापनमा २२ लाख, पुरस्कारमा १९ लाख खर्च भएको उल्लेख गरे भने प्रचारप्रसार ३ लाख २४ हजार रुपैयाँ खर्च भएको जनाइएको छ । यस्तै, मैदान ब्यवस्थापनमा ३ लाख ७५ हजार रुपैयाँ खर्चिएको उनले प्रस्टयाए । यस्तै, यातायात व्यवस्थापनमा १ लाख ७५ हजार, रेफ्री व्यवस्थापनमा ४ लाख २३ हजार, अतिथि सत्कार खर्च १ लाख ६५ हजार, स्वयंसेवक तथा सुरक्षा खर्च १ लाख ४५ हजार, उद्घाटन तथा समापन खर्च २ लाख १५ हजार साथै विविध खर्च भन्दै १ लाख ९ हजार देखाइएको छ ।
