कोशी प्रदेश पर्यटन वर्ष २०८२ को सुरुवात तेह्रथुमको तीनजुरे मिल्के जलजलेबाट हुने भएको छ । कोशी प्रदेश पर्यटन वर्ष २०८२ निर्देशक समितिका सह संयोजक भविषकुमार श्रेष्ठका अनुसार चैत्र २७ गते लालीगुराँस फुलको राजधानी क्षेत्र टिएमजेबाट पर्यटन वर्षको औपचारिक सुरुवात हुने भएको हो ।
पयर्टनसँगै प्रदेशका रमणीय क्षेत्र र पहिचानलाई थप उजागर गर्ने उद्देश्यसहित वर्षभरि प्रदेश सरकारले विभिन्न कार्यक्रम गर्ने बताएका सह संयोजक श्रेष्ठले मुलुकभित्र र छिमेकी राष्ट्र भारतबाट कम्तीमा १७ लाख पर्यटकलाई पर्यटन वर्षको उत्सवमा सहभागी गराउने जानकारी दिए ।
पर्यटन वर्षको तयारीका लागि प्रदेश सरकारसंगै मन्त्रालय, र समितिले घनिभूत रुपमा काम सुरु गरिसकेको बताएका सह संयोजक श्रेष्ठले प्रदेशका मुख्य शहरमा र स्थानीय तहसँग समन्वय अन्तक्र्रिया र छलफल हुदै आएको बताए । उनले भने,‘हामी प्रदेशवासीले पर्यटन वर्षलाई सफल बनाउने हामी सबै प्रदेशवासीको दायित्व हो । यसका लागि सबैको सहयोग र साथ आवश्यक छ । तथापि केही नीतिगत रुपमा चुनौति देखिएको छ । यसलाईपनि समयमै हल गर्न सक्दा पर्यटन वर्षको सफलतामा सहजता हुनेछ । चाहे त्यो सीमाक्षेत्रमा आउने पर्यटकलाई होस् या पर्यटन, होटल ब्यवसायीलाई पर्ने समस्या । सरकारसंगै सम्बन्धित निकायबसेर देखिएका नीतिगत समस्याको हल खोजिनु आवश्यक छ । ’
पर्यटन वर्षको उद्घाटन प्रधानमन्त्री केपी शर्मा ओलीले गर्ने बताउँदै उनले पर्यटन वर्ष २०८२ को मस्कट र लोगो समेत सार्वजनिक भइसकेको बताए । उनले भने, ‘हामीले मस्कट र लोगोलाई समेत प्रस्ट, सफा र प्रदेशलाई बुझाउने अर्थमा बनाएकाछौ । मस्कटमा हाब्रेलाई र लोगोमा सगरमाथा, कोशी नदी, र अर्नालाई समावेश गरेकाछौ। भाषागत रुपमा समेत हामीले रमणीय कोशी मात्र राखेकाछौ । जसको अर्थ कोशी प्रदेशका हरेक स्थान, देवालय, पर्वत, नदीनाला र घुमाघाम गन्तब्यले विशेष र रमणीय अर्थ बोकेको छ । ’
पाँचथर, इलाम लगायतका सीमित पहाडी जिल्लामा भेटिने लोपोन्मुख हाब्रेलाई ब्राण्डिंग गर्नुपर्ने उनको भनाई छ । त्यसैगरि, सुनसरीको चतराक्षेत्रमा पाइने अर्को लोपोन्मुख अर्नालाई पनि विशेष प्राथमिकतामा राखिएको उनले बताए ।
समितिले पहिलोवर्षमा प्रदेशका १४ जिल्लामा बृहत कार्यक्रम गर्ने जनाउँदै उनले अन्तर्क्रिया, गोष्ठीभन्दा पनि पर्यटन क्षेत्रलाई टेवा पुग्नेगरि काम हुने बताए। समितिले स्थानीय तहसंग विशेष समन्वय गर्दै त्यहाँ भएका महत्त्वपूर्ण स्थानको विषयमा समेत जानकारी मागिसकेको जनाएको छ ।
यद्यपि, अझैपनि होटल तथा पर्यटन ब्यवसायको नवीकरणदेखि शुल्क, पर्यटन प्रहरीको अभाव भने कायम नै रहेको छ। नाका क्षेत्रमा पर्यटक भित्राउन सहज नभएको सीमाक्षेत्रका पर्यटक ब्यवसायीहरुको गुनासो कायम छ। गत असोजमा प्रदेश सरकारले पर्यटन वर्षको घोषणा गरिरहँदा सीमाबाट भित्रिने पर्यटकले सास्ती भोग्दै आएका छन्।
सीमा क्षेत्रबाट भित्रिने सवारीलाई प्रदेश सरकारले उपलब्ध गराउने स्टीकर टासेपछि आवश्यक परेको खण्डमा जाँच गर्न सकिने भएपनि सुरक्षा निकायले चेकिंगका नाममा ठाउँठाउँमा दुःख दिने गरेको काकडभिट्टाका पर्यटन ब्यवसायी तथा मेची नगर होटल ब्यवसायी संघका अध्यक्ष सुरेश गोपाल श्रेष्ठले गुनासो गरेका थिए ।
केहीदिन अघि झापामा पर्यटन वर्षको विषयमा राखिएको सर्वपक्षीय छलफलमा उनले पूर्वी नाका पर्यटक मैत्री नभएको बताएका थिए । उनले भने, ‘पर्यटकहरुलाई मेचीपुलबाट काकडभिट्टासम्मको होटलसम्म आइपुग्न कम्तीमा चारवटा सवारी परिवर्तन गर्नुपर्ने अवस्था छ । नेपाली भूमि टेक्नासाथ पर्यटकका झंझट सुरु हुने गरेको छ ।पुलमै तस्करीका सामान ओसारपोसार गर्नेहरुले आवागमनमा समस्या ल्याउने गरेकाछन् ।’
वर्ष अन्त्य चैत्र ३१ बाट बैशाख २ गतेसम्म पाँचथरमा हुने आठौं फालेलुंग चौरी पर्यटन महोत्वस हुदैंछ । हालसम्म सो महोत्वसका लागि समेत सरकारले चासो नराखेको स्थानीयको भनाई छ । स्थानीयका अनुसार पर्यटन वर्ष मनाइरहँदा यसप्रकारको महोत्सवमा सरकारको ध्यान पुग्न आवश्यक हुनुपर्ने हो ।
