शल्यक्रियाबाट बच्चा जन्माउने प्रवृत्ति बढ्दो

स्वास्थ्य/शैली

गृहपृष्ठ
स्वास्थ्य/शैली

शल्यक्रियाबाट बच्चा जन्माउने प्रवृत्ति बढ्दो आमा र बच्चालाई खतरा छ या नर्मल डेलिभरी गर्न सकिन्न भने सिजेरियन सेक्सन गरिन्छ

फक्ताङलुङ म्यागजिन संवाददाता बुधबार, पुस १५, २०७७

शल्यक्रिया (अप्रेसन) अर्थात् ‘सिजेरियन सेक्सन’ गरी बच्चा जन्माउने प्रचलन बढेको छ । विभिन्न कारणले अहिले शल्यक्रियामार्फत् बच्चा जन्माउनु प्रचलनको रूपमा विकास हुँदै गएको छ । फेरिएको र सुधारिएको जीवनशैली र प्रसव पीडाबाट मुक्त हुन शल्यक्रियामार्फत् बच्चा जन्माउन चाहनेको सङ्ख्या बढी रहेको चिकित्सक बताउँछन् ।
बीपी कोइराला स्वाथ्य विज्ञान प्रतिष्ठान धरानकी एशोसिएट प्रोफेसर डा. ज्योति अग्रवालका अनुसार बीपीमा विविध कारणका बिरामीका लागि मात्रै यस्तो विधि अपनाइने बताइन् । स्त्री तथा प्रसूति रोग विशेषज्ञ समेत रहेकी उनले सालले बच्चा निक्लने बाटो ढाक्नु, बच्चा निस्कने ठाउँ साँघुरो हुनु, बच्चाको तौल कम हुनु, डेलीभरी गराउँदा गराउँदै बच्चाको मुटुको ढुकढुकी कम भयो वा अनियमित हुनु, पेटभित्र नै बच्चाले दिसा गरेमा, गर्भवतीलाई उच्च या कम रक्तचाप हुनु, बच्चा उल्टो वा तेर्सो बसेमा, बच्चामा धड्कन बढ्ने, बच्चाले दिशा गरेमा, आमालाई मधुमेह भएमा र कतिपय अवस्थामा आमाको उमेरका कारण पनि शल्यक्रिया गर्नुपर्ने अवस्था आउने बताइन् ।
‘महिलाहरुको उचाइ र तौल थोरै भएमा पनि खतरा हुन्छ । पाठेघरको मुख सानो भएमा, पहिला गर्भपतन गरेको वा बच्चा खेर गएको अवस्थामा पनि सिजेरियन सेक्सन गरिन्छ,’ अग्रवाल भन्छिन्, ‘आमा र बच्चालाई खतरा छ या नर्मल डेलिभरी गर्न सकिन्न भने सिजेरियन सेक्सन गरिन्छ ।’
कतिपय निजी अस्पतालहरूले भने अप्रेसनलाई नै जोड दिने सम्बन्धित क्षेत्रका विज्ञ नै बताउँछन् । ‘निजी अस्पतालले नर्मल हुँदासमेत पनि गरेको देखिएको छ’, धरानका भुक्तभोगी भन्छन्, ‘शरीर फिट राख्न चाहने र प्रसव पीडा सहन नसक्ने हुँदा त ठीकै हो तर नर्मल नै हुँदा त किन गर्नुप¥यो अप्रेसन ?’
चिकित्सकका अनुसार अहिले कोही महिला रिस्क लिन चाहँदैनन् । डाक्टर र अस्पताल पनि रिस्कमा काम गर्न रुचाउँदैनन् । ‘साइत हेरेर बच्चा जन्माउने, ब्युटी कन्सस हुनेहरु र प्रसव पीडा सहन नसक्नेहरु सिजेरियन सेक्सन गर्न आउने ट्रेन्ड चलेको छ,’ एक चिकित्सक नाम नछाप्ने शर्तमा भन्छन्, ‘तर, उहाँहरुलाई हामी सम्झाउँछौँ । सम्झाउँदा भएन भने भनेजस्तै त गर्नैप¥यो नि ।’ गर्भवती महिला वा बच्चालाई केही खतरा भएमा अस्पताल तोडफोड हुने कारणले पनि आजकाल धेरैजसो सिजेरियन डेलिभरी हुने उनको कथन छ ।
डा. अग्रवालका अनुसार नर्मल डेलिभरी नै प्राकृतिक हो । अप्रेसनमा कडा एण्टिबायोटिक खानुपर्छ । बच्चाले आमाको दुध चुस्दा दुधसँगै एण्टिबायोटिक पनि जान्छ । कडा एण्टिबायोटिक खाएको बच्चाको स्वास्थ्य कस्तो होला ? यसका लागि सचेतना जरुरी छ ।

प्रकाशित मिति: बुधबार, पुस १५, २०७७ २०:०४

प्रतिक्रिया दिनुहोस्