बन्यो नेपालकै दोस्रो लामो पुल, स्थानीय भन्छन्- गए दुःखका दिन, अबका सन्तानले बगेर खोलामै ज्यान फाल्नुपर्दैन

दैनिक समाचार

गृहपृष्ठ
दैनिक समाचार

बन्यो नेपालकै दोस्रो लामो पुल, स्थानीय भन्छन्- गए दुःखका दिन, अबका सन्तानले बगेर खोलामै ज्यान फाल्नुपर्दैन

फक्ताङलुङ म्यागजिन संवाददाता शनिबार, फागुन ७, २०७८

इलामः माई–६ महमाईकी ७० वर्षीया अमृतमाया फ्याक माइखोला तर्दा बिताएका कहालीलाग्दो घटना सम्झिँदै एकोहोरो बन्छिन् । ‘३ वर्षअघि तीनजना आफन्त नानीहरु स्कुलबाट घर फर्किँदा यही खोलाले बगाएर अहिलेसम्म बेपत्ता भएको छन्, वारीपारी गर्नेलाई ज्यान जोखिममा राखेर तर्नुपर्ने बाध्यता थियो, बिस्तारै ती दुःखका दिन हट्दै गएका छन् ।’
वृद्धावस्थाकी फ्याक विगतमा बिताएको बाध्यात्मक कष्टकर जीवन अब हटेको भन्दै पुल निर्माण गराउने सबैलाई आशिर्वाद दिएको बताइन् । माई–६ को बिहीबारे र माई –१ को घण्टे जोडने माइखोलामा नेपालकै दोस्रो लामो ८ सय २२ दशमलब २२ मिटर लामो पुल बनेपछि अबका सन्तान खोलामै बगेर ज्यान फाल्नुपर्ने दिन सकिएको महमाई–६ का ७६ वर्षीय निलबहादुर फत्र भनाइ छ । उनले आवतजावत खुला गरिएको झोलुङ्गे पुलको बिच भागमा अडिएर अबका सन्तानलाई खोलामै बगेर मर्नु पर्ने दिन सकिएको भन्दै खुशी ब्यक्त गरिन् ।
माई–१ का दीपक श्रेष्ठ माई नगरको माझीटार, खत्रपा,ज्वाले, घन्टे, महमाई लगायत जितपुर सिद्धिथुम्का, देउमाईका बासिन्दालाई झोलुङ्गेपुलले कष्टकर दिन हटाएको बताउँछन् । स्थानीय भानुभक्त राई खाद्यान्नलगायतका सामाग्री ट्युवमा हालेरै भएपनि जीवन गुजारेको सम्झिँदै ती दिन सकिएकोमा आफूलगायत गाउँ नै खुशी भएको जानकारी दिए ।
निर्माण कम्पनी उमा थानी हिमशिखर जेभीले २०७७ असार २२ गते सम्झौता गरी २०७९ असार १९मा सम्पन्न गर्नुपर्ने भएपनि लक्ष्यभन्दा ६ महिनाअघि नै १० करोड ३ लाख ७४ हजार १ सय १२ रुपैया २३ पैसामा पुल निर्माण सम्पन्न गरेको हो । निर्माण सम्पन्न पुल शनिबार झोलुङ्गे पुल महाशाखालाई हस्तान्तरण गरिएको संघीय मामिला तथा सामान्य प्रशासन मन्त्रालय अन्तर्गत स्थानीय पूर्वाधार विभाग एसपेन्सन ब्रिज डिभिजन पुलचौक ललितपुरका सब इन्जिनियर उपेन्द्र देवकोटाले जानकारी दिए । सब इन्जिनियर देवकोटाले माईका मेयर दिपक कुमार थेबे र वडा नम्बर –६ का वडाध्यक्ष मुखराज आङ्दम्बेको प्रमुख सकृयतामा पुल बन्न सकेको जानकारी दिए ।
सात वटा पिलरसहित निर्माण भएको पुलमा चार वटा मुख्य टावर छन् भने ३ वटा मेन एक्करेज ब्लक रहेको छ । माईका मेयर दीपककुमार थेबेले निर्माण सम्पन्न पुलको अनुगमन गर्दै केही दिनमै प्राविधिक परीक्षणपछि महाशाखा मार्फत स्थानीय समुदायले जिम्मेवारी ग्रहण गरिने जानकारी दिए । झोलुङ्गे पुललाई पर्यटकीय महत्वका हिसाबले पनि विशेष मानिएको छ । अहिले टिकटक बनाउने र सेल्फी खिच्नेको भिड लाग्न थालेको छ । पैदल हिँड्दा १५ मिनेट लाग्ने पुलको विच भागमा नगरकै लगानीमा छानो सहितको प्रतिक्षालय बनाईने मेयर थेबेले बताए ।
निर्माण भएका झोलुङ्गे पुलहरुमा महाकालीको चाँदनी दोधारा जोड्ने १ हजार ४ सय ५२ मिटर लामो पुललाई नेपालकै लामो मानिन्छ भने माई खोलामा निर्माण सम्पन्न यो पुल दोस्रो हो । नेपालको भुभाग त्रिवेणी सुस्ताको सिमाना नारायणी नदीमा भने १५ सय ७२ मिटर लामो झोलुङ्गे पुल निर्माणाधीन अवस्थामा रहेको बताइएको छ ।
पछिल्लो ४ बर्षको अबधिमा यो सँगै अन्य ४ बटा झोलुङ्गे पुल र एक पक्की पुल बनि सकेको माईका मेयर दिपक कुमार थेबेले जानकारी दिए । माई–१ को चेप्टी र माई–८ को दुङदुङ्गे, चेप्टी र भतभते तथा ढकने र भतभते बिचमा साथै माई–१ को पालटार र माई–७ को लक्ष्मीबाधको चण्डालघाटमा ५ सय ५० मिटर लामो पक्की मोटरेबल पुल निर्माण सम्पन्न भईसकेका छन भने माई–६ को सेतिखहरे र माई–१ को ज्बाले बिचमा टेन्डर लागि सकेको छ । यो सँगै इलामको कर्णाली भनेर चिनिने महमाई अहिले चौतर्फी विकासले फड्को मार्दै रहेको बताइएको छ । -विमल दाहाल

प्रकाशित मिति: शनिबार, फागुन ७, २०७८ ११:२७

प्रतिक्रिया दिनुहोस्