धरानमा उपभोक्ता नै मिलेर ल्याए पानी, टयाङ्की निर्माण गरे

दैनिक समाचार

गृहपृष्ठ
दैनिक समाचार

धरानमा उपभोक्ता नै मिलेर ल्याए पानी, टयाङ्की निर्माण गरे

फक्ताङलुङ म्यागजिन संवाददाता आइतबार, भदौ ५, २०७९

धरानः धरानमा उपभोक्ता आफैं मिलेर खानेपानीको टयाङ्की निर्माण गरेका छन् ।
धरान–१४ (झोलुङ्गेपुल छेऊछाउका) का बासिन्दाले पानीको जोहो गर्न लागिमात्रै परेनन्, पानी ल्याएर खानेपानीको वैज्ञानिक र व्यवस्थित रिजर्भ ट्याङ्की समेत निर्माण गरेका हुन् । विजयपुर यायोक्खा टोलमा उपभोक्ताहरुको सक्रियतामा आफ्नै लगानी र परिश्रमबाट खानेपानीमात्रै ल्याएनन् वैज्ञानिक, व्यवस्थित र प्रविधियुक्त ट्याङ्की निर्माण गरेका छन् ।
२० लाख रुपैयाँको लागतमा आफ्नै श्रम र लगानीले पानी ल्याएर र ट्याङ्की निर्माण गरेर देखाइदिएका हुन् । यायोक्खा मार्ग खानेपानी उपभोक्ता समितिका अध्यक्ष मातृका राईले
यसअघि २ किलोमिटर दक्षिणमा रहेको भालुखोलाको मुहानबाट आफ्नै श्रमले अढाइ इन्चको पाइपमा पानी ल्याएर खाँदै गरेका स्थानीयले अहिले वैज्ञानिक, व्यवस्थित र प्रविधियुक्त ट्याङ्की समेत निर्माण गरेका हुन् । ‘यसअघि पाइपको डाइरेक्ट पानी तानेर दुषित र धमिलो पानी खाइरहनुपरेको थियो’, उपभोक्ता समितिका सचिव केवी राईले भने, ‘अहिले व्यवस्थित र प्रविधियुक्त ट्याङ्की निर्माण गरिएको छ, जहाँ फिल्टरसमेत हुने गर्दछ, धमिलो पानी आए सिधै फाल्ने प्रविधि जडान छ, त्यसैले सफा र शुद्ध पानी खान पाएका छौं ।’
अहिले त्यहाँ ७० हजार लिटरको रिजर्भ टयाङ्की निर्माण भएको छ । स्थानीय निर चाम्लिङको परिकल्पना र डिजाइनमा सो ट्याङ्की निर्माण भएको कोषाध्यक्ष मीना राईले जानकारी दिइन् । सो टयाङ्कीको धरान–१४ का वडाध्यक्ष कृष्णप्रसाद भट्टराईले गरे ।
टयाङ्कीको माथिल्लो भागमा रमिता हेर्ने बनाइनुका साथै मिटिङ हल निर्माण गरिएको छ ।े माथिल्लो भागमै नेपालको राष्ट्रिय झन्डा फहराइएको छ । पानी टम्म भरिँदा झन्डा माथि हुने र पानी रित्तिदै जाँदा झन्डा तल झर्ने प्रविधियुक्त बनाइएको छ । कार्यक्रममा बोल्दै वडाध्यक्ष भट्टराईले टयाङ्कीको माथिल्लो भागमा छाना लगाउने र मिटिङ हलजस्तो वडाले बनाइदिने घोषणा गरे । आगलागी भए टयाङ्कीको पानी दमकललाई जतिसक्दो छिटो दिनसक्ने प्रविधि पनि जडान गरिएको डिजाइनर राईले जानकारी दिए ।
सो पानी करिब १ सय ५० घरले उपभोग गर्न पाउने सचिव केवी बताउँछन् । २२ घरधुरीको लागि मिटर जडान भइसकेको उनले जानकारी दिए ।

प्रकाशित मिति: आइतबार, भदौ ५, २०७९ १४:०८

प्रतिक्रिया दिनुहोस्